Días de agosto. Mañás cargadas de luz, de espertares preguizosos cargados de bicos e abrazos dos teus pequenos brazos. De almorzos na cama - da que son botada sen moitas contemplacións, para prepararvos o zume e as tostadas -. De arranxar correndo a casa e coller as catro cousas coas que imos á praia.
Mañás cheas do aroma á crema solar coa que vos rebozamos. De ir os cinco á pequena praia, que nin praia é, a pasear pola beira, a coller cangrexos para soltalos de novo, de escoitar explicacións sobre a fauna da ribeira. De parar cada pouco para botar un pitillo mentres ti me amosas como sabes nadar sen manguitos. De escoitar as túas cancións inventadas e a lista completa da clasificación dos equipos na Liga de fútbol.
Mañás cheas de charlas con papá, a modiño, remollando os pés e sentindo o sol no lombo.
Chegar á casa e sentar a comer - hoxe hai tortilla de patacas, que ben! -.
Mañás de agosto ao voso lado. A que pouco me sabe un mes enteiro.
©Chulihorro
No hay comentarios:
Publicar un comentario